Janie

Janie

Oleh: Rara Paloepie.

I.

„LEKASLAH, Lem kaoe pergi ka pasar berbelandja dan kemoedian masak jang ledzat, kerna sebentar siang Niek aken dateng.”

„Nanti tentoe saja pangling pada 'den-adjeng, sébab saben vacantie poelang ka roemah, tentoe tambah besarnja dan tjantiknja. Saja nanti aken masaken nasi goerih boeat sebagi penjamboetan slamet dateng.”

„Ja, masak jang enak. Tetapi djangan banjak omong, temponja nanti abis diboeat mengobrol sadja. Sekarang lekas ka pasar berbelandja.”

Jang bertjakepan itoe adalah R. A. Tjakrawardaja, djanda dari R. Tjakrawardaja, bekas Wedana dari Sragen, dan sekarang tinggal di Djokja, bertjakepan dengen boedjang prempoeannja, Ilem.

Ilem sigra pergi blandja ka pasar boeat membeli daging, sajoeran dan laen-laennja kaperloean masak.

Sapeninggalnja sang boedjang, R. A. Tjakra laloe meliat gambar-gambar dan pot-pot kembang, preksa apa semoea telah teratoer baek dan tida kotor, dan mana jang tida betoel laloe dibetoelken. R, A, Tjakrawardaja itoe tida tinggal di roemah gedong jang indah atawa jang banjak perabotannja, hanja tjoema bertinggal di satoe roemah batoe jang ketjil dan tjoema dengen sedikit perabotan, tapi tertampaknja roemah jang saderhana itoe ada resik dan netjis kerna dari baeknja perawatan dan mengatoernja.

Selagi marika berdoea bertjakep-tjakep dengen asik, satoe andong (kreta) telah mendatengin dan brenti depan itoe roemah.

„Oh, Janta dateng,” katanja itoe iboe,

Janta masoek ka dalem dan memberi hormat pada marika berdoea.

„Inilah ada kaoe poenja 'mbak-ajoe jang kita telah toenggoein kedatengannja,” begitoelah R. A. Tjakra telah berkata dan perkenalken sang poetri kepada keponakannja itoe.

Janta laloe angsoerken tangannja dan djabat tangannja itoe gadis seraja kata: „Lieve nicht, slamet dateng dan slamet berkenal. Maski kita bersoedara, tapi baroe sekarang ini kita saling kenal.” „Ja, beste neef, sama-sama,” saoetnja Niek dengen bersenjoem simpoel. „Dari mana sadja kaoe goenaken ini tempo vacantie?”

Akoe baroesan dateng dari Poerwaredja menengokin Oom Dana di sana, Dari sana kamoedian akoe niat poelang ka Rembang, tapi dengen di loear kemaoean akoe mendadak kombali mampir poela di Djokja, boleh djadi ini disebabkon akoe dimoestiken ketemoeken dan samboet kaoe poenja kedatengan, 'bak-ajoe.”

Niek samboet itoe pernjata’an dengen iapoenja senjoem simpoel jang manis, kerna iapoenja soedjen-soedjen jang eilok itoe seperti menggenggem riboean tetes sari madoe.

Paginja djam 7 marika soedah berada di Aloen-aloen dan mengadang bus jang aken bawak Janie dan iboenja ka Parakan.

Janie tjoema bawak Ilem sadja dan tinggalken Kasimin boeat melajanin Janta jang tida maoe pindah ka laen roemah.

Kapan itoe bus telah bawak linjap Janie dan iboenja, Janta rasaken bahoea soemangetnja telah linjap.

Begitoelah Janta kemoedian masoek sekolah dengen pikiran limboeng.

Kapan djam 1 telah sampe dan Janta poelang dari sekolahan, ia membajangken bahoea Janie biasa menjamboet iapoenja kedatengan di depan roemah. Tapi sekarang kapan ia sampe di itoe roemah, boekan lagi Janie jang tjantik menjamboet iapoenja poelang itoe, hanja....... Kasimin jang samboet dan laloe pegang itoe fiets jang baroesan ia toenggangin

Drijanta dengen tindakan lesoe laloe masoek ka dalem roemah dan bantingken dirinja atas satoe korsi, lamoenken pikirannja dan membajangken itoe ampat boelan tempo jang sanget menggoembiraken kepadanja.

Itoe ampat boelan adalah tempo mas jang ia telah dapetken. Biasanja kaloe ia poelang dari sekolahan, ia dapet samboetan jang manis dari Janie dan kapan ia poelang dari sekolahan, roemah jang ia aken masoekin itoe tertampaknja mengloearken sinar mas, begitoe hidoep dan bersoemanget. Tapi sekarang......... roemah ini mendadak begini soenji dan mati.

„Kenapa ini roemah dalem brapa djam sadja bisa berbalik begini matjem?” Janta menggerendeng sendirian. „Brapa djam jang laloe, ini roemah masih kliatan hidoep; tapi sekarang........ roemah ini berobah sebagi roemah mait!”

Janta laloe masoek ka dalem kamarnja, zonder ganti pakean loear, ia baringken dirinja atas pembaringan, lajangken pikirannja pada itoe kemanisan-kemanisan penghidoepan jang telah linjap hingga pikirannja telah kalelep dalem lamoenan jang moeloek. Tapi jang ia bajangken dan lamoenken, tida Iaen tjoema Janie, bajangken iapoenja soe. Ajen-soedjen jang menggenggem madoe, iapoenja mata jang mengember aer kasoetjian dan mengoemandangken iapoenja soeara jang saolah-olah lagoe dari sorga.

Pada soeatoe sore, sang magerip aken mendatengin dan Janie lagi doedoek di pekarangan depan boeat toengkoelin iapoenja taneman kembang-kembang satoe auto telah brenti di depan roemahnja, dalem kandaran mana ada kliatan toeroen saorang jang koeroes. Janie awasin padanja dengen mata tida berkesip.

Itoe lelaki satelah toeroen dari itoe auto laloe masoek ka dalem itoe pekarangan, siapa poen tertampak merasa heran kerna itoe gadis tjoema mengawasin sadja dan tinggal boengkem.

„'Mbak-joe Janie......!” berseroeh itoe lelaki dengen tida lampias.

„Oh, kaoe... 'dek Janta!” berseroe Janie. „Kaoe telah berobah banjak sekali! Akoe kira kaoe ada saorang toea dari laen tempat jang kesasar kemari!”

Iboenja Janie poen sigra tertampak kloear, Ini orang toea poen merasa sanget heran meliat Janta jang doeloenja gagah sekarang tertampak lajoe dan pipinja kempot saolah-olah saorang toea.

„Anakkoe,” katanja R. A. Tjakra, „kenapa kaoe berobah begini roepa? Adakah kaoe mendapet sakit dan sakit apa?”

„Anakda tida sakit, bibi,” saoetnja Janta dan tida landjoetken oetjapannja.

Janie dan iboenja tida banjak kata lagi kerna menampak bahoea itoe koetika romannja Janta tertampak sanget sedih.

Satelah berdoedoek Janta kemoedian laloe kloearken itoe telegram jang ia baroesan trima dari Rembang dan trimaken kepada Janie.

Janie trima itoe angsoeran dan batja, kemoedian ia kata: „Oh, kaoe poenja ajah sakit keras. Sakit apakah itoe? Tentoenja kaoe lantas poelang ka Rembang, ‘dek?"

„Ja, 'mbak-joe, dan kaloe kaoe bersama iboe soeka, akoe aken adjak bersama-sama ka sana.”

Setengah taoen kemoedian kapan Soendjata dapet verlof, ia ingin goenaken boeat pergi ka Batavia. Begitoelah itoe sore ia laloe ketemoein Janie boeat njataken maksoednja.

„Janie, adékoe,” katanja Soendjata, „akoe mendapet verlof dan akoe aken goenaken tempo itoe boeat pergi ka Betawie......"

Denger itoe oetjapan „Betawie”, parasnja Janie tertampak berobah merah.

„Kaoe aken titip apa, adék,” kamoedian Soendjata kata poela.

„Akoe tida taoe apa jang akoe haroes titip pada kaoe, mas.......” saoetnja Janie dengen koerang terlampias. „Maka akoe paserah pada kaoe sadja, apa ang kaoe aken oleh-olehken boeat akoe.”

„Masa kaoe tida ada laen keperloean. Ingetlah, kaoe tida perloe soengkan kepadakoe, sebab akoe senantiasa sediaken tenagakoe goenamoe.”

Janie toendoekin kepalanja dan berpikir.

„Ja, kanda, kaloe kaoe telah sampe di sana, soekalah kaoe koendjoengin ......” katanja Janie dan kemoedian tida bisa landjoetken oetjapannja kerna tenggorokannja seperti terkantjing.

Soendjata awasin padanja dengen penoeh perasa’an kesian, kemoedian kata sebagi menjamboengin oetjapannja Janie jang tida dapet terlampias: „Ka Janta....... ?”