Peringetan dari Tempo Doeloe

Tjitjoeroeg, 31-7-'41. -

K. T. H.

Peringetan dari Tempo Doeloe.

Oleh K. T. H.

Sadari lohor oedjan toeroen tida berentinja, hingga kagoembirahan pendoedoek Tionghoa boeat merajaken taon baroenja djadi seperti tertindes.

Soeara petasan tjoemah kadang-kadang sadja kadengeran, kerna berhoeboeng dengen peperangan di Tiongkok ada banjak orang Tionghoa jang kasèrèt oleh aliran „aykok moerah“ soedah ambil poetoesan aken „himatken ongkos“ di waktoe Sientjhia dengen tida bakar petasan dan tida maoe oendjoek kagirangan, maski djoega marika anggep tida ada halangan kaloe kaloearken beberapa poeloeh roepiah boeat beli barang makanan sedep, bikin pakean baroe, pergi menonton atawa djalan pesiar, zonder menderma satoe cent goena Fonds Tiongkok. Ini samoea tida djadi halangan apa-apa boeat dapet seboetan „aykok,“ kaloe sadja di maleman atawa harian Sientjhia iaorang tida bakar satoe doea rentjeng petasan jang berharga ampat lima roepiah!

Maski ini kalih, seperti djoega doea taon laloe, pendoedoek Tionghoa poenja Sientjhia kaliatannja „sepi“ lantaran adanja itoe aliran „aykok“ jang amat santer, toch soemanget dari kagirangan dan kagoembirahan oemoem tida bisa ditindes oleh „perkaboengan“ poera-poera dan „tjinta bangsa“ jang dibikin-bikin. Pada itoe maleman djikauw-mèh banjak roemah-roemah dipasangin lampoe dengen lebih terang dari biasa; bagian pertengahannja soedah didandanin rapih, dirias dengen vas-vas berisi kembang seger, sedeng glas dan tjangkir minoeman, bersamastofflesch berisi bischuit dan koewe-koewe, soedah diatoer rapih boeat disadjiken pada tetamoe-tetamoe jang bakal dateng berkoendjoeng. Dan maskipoen itoe persedia'an boeat rajaken Taon Baroe soedah dikerdjain sadari beberapa minggoe di moeka, sampe di itoe malem si tosan dan njonja roemah masih sadja iboek dan ripoeh aken tambahin ini dan itoe jang belon lengkep, samentara kaoem pamoeda dan anak-anak ketjil dengen girang pikirin pada segala kaplesiran jang marika aken alamken besok dan hari-hari berikoetnja, boeat koendjoengin sanak familie dan berkoempoel dengen sobat-sobat sambil mentjari kasenangan hati, mata, keeping dan moeloet.

Satoe kalih, koetika abis boelan ia terima gadjinja, kabetoelan salah-satoe tetangga ada bikin pesta kawinan dimana pada tetamoe-tetamoe diberi kasempetan boeat berdjoedi. Tham Tjay jang pergi ka itoe pesta dan menjaksiken bagimana soesoenan oewang kertas berpindah tangan dengen gampang, laloe pikir hendak tjoba peroentoengannja, kaloe-kaloe ia bisa dapet kamenangan jang tjoekoep boeat didjadiken modal aken berdagang ketjil. Begitoelah dengen kapitaal f 12,50 ia moelai toeroet ambil bagian dalem permaenan kêlês (mee-thoa) dimana boeat satoe djam jang pertama ia telah berhatsil bagoes dan bisa kantongin kira f 50, tapi belakangan kelanggar apes hingga boekan sadja itoe kamenangan, hanja kapitaalnja sendiripoen toeroet loedes sama sekalih. Kasoedahannja dalem itoe boelan ia tida bisa bajar itoe f 5 pada soedaranja, jang atas asoetan istrinja soedah djadi begitoe goesar hingga mengantjem hendak oesir padanja djikaloe sampe tanggal 10 ia belon bisa adaken itoe oewang.

Tham Tjay ada poenja beberapa sobat, pamoeda pamoeda miskin seperti ia, pada siapa ia boleh menoempang tinggal boeat samentara waktoe; tetapi kapan berlaloe dari roemah soedaranja ia koeatir oleh Sian Nio dan orang toeanja ia nanti dipandang rendah, dikataken ,,tida bisa akoer sama soedara sendiri.” Maka itoe koetika besok paginja oleh madjikannja ia disoeroe menagi oewang pada beberapa langganan, satoe rekening dari f 10 jang orang bajar ia simpangin ka sakoenja send ri dengen membilang „orangnja belon ketemoe”, dan sang tauwkee jang koerang terliti tida pereksa satoe per satoe rekening jang masih ada di tangannja Tham Tjay, hingga itoe knoeie tida lekas kataoean.

Samentara itoe sang tauwkee moelai bertjoeriga, kerna ada roepa-roepa matjem barang jang koerang, dengen tida kataoean ka mana linjapnja, sedeng beberapa orang mengadoe hal itoe satoe langganan, jang sekongkol dengen Tham Tjay, bisa djoeal barang dengen harga lebih rendah dari-pada jang ia sendiri djoealin padanja. Maka dengen diam-diam itoe tauwkee pasang mata, dan koetika itoe langganan abis belandja dan barang-barangnja soedah dipak dengen rapih oleh Tham Tjay jang biasa lajanin sendiri padanja, itoe tauwkee soeroe boeka lagi itoe boengkoesan dan tjotjokin isinja satoe per satoe. Di itoe sa’at lantes kataoean itoe langganan ada terima barang-barang saharga beberapa blas roepiah lebih banjak dari-pada apa jang ia beli, dan maski Tham Tjay bersoempah pandjang-pendek jang itoe kalebihan boekan disengadja hanja dari kakeliroean lantaran terlaloe repot, sang tauwkee tida taro kapertjaja’an lagi padanja. Samoea penagian rekening jang ia biasa oeroes lantes dipereksa dan ditjotjokin dengen terliti satoe persatoe, hingga iapoenja penipoean jang doeloean poen toeroet terbongkar, dan kataoean ia soedah bikin tekort ampir f 100, dan sang tauwkee jang goesar sanget laloe bersedia boeat mengadoe pada politie, maski Tham Tjay berdjandji maoe ganti dengen lantes itoe katekoran.

„Ini katekoran dari oewang rekening tida saberapa kapan dibanding dengen harganja barang jang kaoe kasih kaloear diam-diam dengen sekongkol pada satoe atawa lebih banjak nan,” kata itoe tauwkee, „Akoe rasa djoemblah barang jang kaoe tjoeri dengen ini djalan ada harga riboean ; maka tida tjoekoep kaloe kaoe ganti itoe oewjang rekening saratoes roepiah. Kaloe kaoe tida ingin masoek dalem boewi, kaoe moesti bajar limaratoes roepiah contant sekarang djoega.”

„Owenanti² tjoba adaken itoe dengen minta pindjem pada owe poenja familie, kaloe sadja dikasih tempo sampe besok pagi,” Tham Tjay beri kasanggoepan.

―„Zonder oewang bagimana bisa beres,” kata Tham Tjay dengen soeara sedih. „Enko tida aken terloepoet lagi dari katjilaka'an masoek dalem boei, sebab sekarang enko lagi ditjari oleh politie, dan begitoe ketemoe lantes ditahan, tida bisa dapet ampoen lagi.”

„Apakah politie bisa berlakoe begitoe keras boeat perkara oetang?” menanja itoe gadis, jang masih tetep mengira itoe kekasih poenja kasoesahan hanja mengenaken oeroesan oetang oewang.

„Ja, sekarang tida boleh maen-maen, telaat membajar satoe hari orang bisa dikasih masoek dalem boewi, kaloe vonnis soedah kaloear,” Tham Tjay mendjoesta teroes. „Enko sekarang dateng disini boeat kasih selamet tinggal pada Sian Nio; ini sekalih kita-orang brangkalih aken berpisah boeat selamanja, sebab djikaloe enko poenja pertjoba'an boeat menjingkir ka laen tempat mendjadi gagal dan enko kena terpegang oleh politie, tentoe enko boenoeh diri . . . .”

„Ah, masa! djangan begitoe, 'ko !” treak Sian Nio dengen katakoetan dan moelai koetjoerken aer matanja.,,Djangan poetoes harepan. Ini kasoesahan bakal linjap kaloe papa soedah koempoel itoe oewang boeat ganti apa jang enko titipken.”

„Sekarang soedah telaat, sebab itoe oewang moesti diserahken tadi sore djam delapan, tapi lantaran enko tida bisa adaken, itoe vonnis moesti didjalanken. Enko dateng sekarang boeat tinggalken ini pesenan soepaja Sian sampeken pada papanja. Kapan enko soedah mati . . . . . boenoeh diri. . . . . itoe gewang biar papa simpenin sadja boeat dipake kaloe Sian hendak menika . . . . . . dapet djodo pada laen lelaki jang nasifnja tida begitoe tjilaka seperti enko . . . . . itoe oewang boeat belikan perhiasan dan pakean sabagi enko poenja soembangan . . . .

Hormat dan soedjoet, S!AN NIO.

Itoe doea soerat dimasoekin dalem satoe envelop dan diletakin di atas medja di pertengahan jang gampang kaliatan dan ditindihin sama tempat aboe roko. Komoedian, dengan membawa itoe beberapa koffer dan boengkoesan, Tham Tjay dan Sian Nio' bertindak ka loear, rapetin pintoe, lantes pergi ka straat, dimana ia ambil satoe dokar tambangan jang disoeroe menoedjoe ka itoe waroeng kopi. Sasoedah ambil iapoenja koffer dan boengkoesan jang dititipken disitoe, komoedian ia perentah koetsir lariken itoe kandaran ka djoeroesan sabelah oedik dan berenti di moeka satoe waroeng tjita ketjil, dimana Tham Tjay membeli doea saroeng, satoe selendang, satoe sapoetangan kepala, satoe tjelana komprang, satoe pasang teroempah, satoe pasang slof koelit, dan satoe badjoe tjita jang soedah didjait. Komoedian ia perentah koetsir bawa kandarannja ka loear kota dengen melaloei tempat jang rada soenji. Di depan satoe pekarangan jang roemahnja terletak djaoe di dalem dan penoeh poehoen-poehoen jang alingin pemandangan, Tham Tjay adjak Sian Nio toeroen dari itoe kandaran sambil angkoet barang-barangnja seperti djoega iaorang hendak masoek ka itoe roemah. Sasoedah itoe dokar berlaloe, ia adjak Sian Nio pergi ka bawah poehoen jang gelap, dimana iaorang toeker pakean, menjamar sabagi orang priboemi, kerna di itoe zaman atoeran pasport masih berlakoe, dan orang Tionghoa lelaki atawa prampoean jang bikin perdjalanan dari satoe ka laen tempat dengen zonder pas, kaloe kataoean bisa ditahan oleh politie.

Sasoedah beres berdandan iaorang angkoetin barang-barangnja ka pinggir straat aken menoenggoe laen dokar tambangan jang liwat. Lantaran itoe tempat ada soenji, sampe satengah djam baroelah liwat satoe dokar jang kosong dengen apa marika landjoetken perdjalanannja boeat maboer.