Kutipan Peringetan dari Tempo Doeloe

Inilah soenggoe åda satoe kategoehan hati dan kaoeletan loear biasa, jang djarang diampoenjai oleh sembarang orang.

Dalem dirinja Tham Tjay ada terdapet bibit dari kabesaran dan kaägoengan jang menjebabken segala apa jang ia kerdjain djadi berhatsil bagoes

dan bikin ia bisa dapetken kadoe-doekan lebih tinggi dari pada orang-orang biasa.

Tham Tjay merasa, jang ka'ada'annja sekarang mirip seperti orang jang terpendjara saoemeer hidoep; maski tida disoeroe bekerdja apa-apa dan malah dikasih makan tjoekoep dan dapet rawatan baek, tapi boeat doenia ia sama djoega soedah mati.

Sasoenggoenja ini doenia, boeat Tham Tjay, tida poenja apa-apa lagi jang bisa menarik perhatiannja, jang memberi sinar terang bagi iapoenja kahidoepan jang tersendirian, sêrêm dan soenji.

Saban kalih ia rebahin diri di atas korsi males sambil bengong memikirin nasifnja, Tham Tjay dapet meliat semingkin djelas iapoenja ka'ada'an hidoep jang tida memoeasken dan tida ada pengharepan apa-apa lagi. Ini kainsjafan membikin tindesannja itoe kakeselan djadi semingkin heibat.

tapi ini ingetan datengnja soedah telaat, sebab terhalang oleh iapoenja kawarasan dan kalemahan toeboeh, jang membikin ia tida bisa merobah kabiasa'annja boeat asingin diri.

Saorang jang soedah beroesia tinggi-jang tabeat dan pikirannja soedah djadi koekoeh, bekoe, kakoe dan keras seperti batoe karang - tiada gampang boeat menoentoet kahidoepan baroe.

Achirnja, sasoedah memikir boelak-balik dari satoe ka laen hari, Tham Tjay poenja perasa'an kesel dan djengkel pada iapoenja penghidoepan laloe berobah mendjadi djemoe, dan itoe kadjemoean achirnja membikin timboelnja perasa'an.... kepingin mati.

Malah kaoe sendiri poen haroes berpoera-poera tida taoe apa-apa, dan djangan sekalih tjerita apa jang akoe bilang sekarang.

Akoe tida perdoeli di mata antero doenia dirikoe dipandang sabagi saorang boesoek, kaloe sadja di matanja Siotjia Ouw Sian Nio akoe tinggal bersih.

"

Solokan ketjil di sapandjang pinggir djalanan poen soedah tida tertampak, kerna tertoetoep oleh buis beton. Maski di itoe sa'at ada banjak orang jang berdjalan moendar-mandir, tida ada satoe jang ia kenalin. Samoea soedah berobah mendjadi laen, serba asing.

Tham Tjay merasa seperti ia berada di laen kota, laen negri, laen doenia. . . . . .

Sasoedah berdiri bengong dengen merasa sangsi boeat beberapa minuut, Tham Tjay landjoetken tindakannja dan baroe merandek koetika ia sampe di betoelan tempat dimana doeloe ada terletak Seng Lie poenja roemah, jang ia bisa kenalin kerna kira sapoeloeh meter di sabelahnja ada satoe djalan simpangan ketjil …