Harta yang Terpendam atau Ceritanya Nyai Marsina

I. SATOE TESTAMENT.

Straat Mangga Doea ada satoe bagian djalanan jang menghoeboengken Pintoe Besar dan Pasar Senen. Straat ini ada ditedoehken oleh poehoen-poehoen kenari jang toemboeh pada kadoea tepi djalanan itoe. Doeapoeloe taon jang laloe ini tempat ada terkenal sebagi sarangnja penjamoem-penjamoen, tetapi sekarang, sasoedanja pakerdjaan politie dirobah djadi lebih baek, dan kapala bangsat jang terkenal soeda diboewang ka laen negri, tida satoe bangsat lagi brani djalanken pakerdjain di ini tempat. Maski begitoe, sampe sekarang djarang ada orang-orang mampoe soeka tinggal disitoe, sebab maskipoen tida kwatir diganggoe lagi oleh rampok, tetapi toch banjaknia koeboeran-koeboeran Islam di tepi djalanan sabelah kiri, tida adanja penerangan gas di waktoe malem, soeda bikin tida enak aken orang tinggal di ini tempat. Di waktoe siang sekali poen, salaennja soeara tram electrisch dan kandaran-kandaran jang liwat pergi dateng, tida ada kadengeran soeara apa-apa lagi; orang liwat poen sedikit sekali, dan bila matahari soeda silem, boleh dibilang djarang ada manoesia jang brani lintasken tempat itoe. Orang-orang Boemipoetra ada pertjaja bahoea itoe koeboeran-koeboeran Islam ada mempoenjai keangkeran. Tersiarnja tjerita bahoea banjak orang liwat ada dapet liat setan-setan, soeda bikin lebih sepi keadaannja ini tempat.

Kasoenjian begitoe ada disoeka oleh orang-orang jang biasa berboeat apa-apa dengen semboeni, Begitoelah satoe roemah model panggoeng jang soeda toea pada tepi kanan dari djalanan itoe, soeda bebrapa lama kaliatan ada diperabotken dengen netjis. Poehoen-poehoen oetan jang sdoeloe ada toemboe lebet dan membikin djelek pada pekarangan itoe roemah, telah ditebang dan ditanemin poehoen-poehoen boengah atawa pot-pot kembang jang dirawat baek.

Tjoeatja jang gelap sekarang moelai diadi terang oleh sinarnja boelan jang gilang-goemilang, sedeng angin ada menioep dengen perlahan pada poehoen-poehoen boengah sembari bawa terbang haroemnja boengah-boengah itoe ka lobang idoengnja Joesoef, tapi dia ini jang lagi kesel, tida dapet endoesin kasedepan itoe.

Pintoe pekarangan di loear ada diboeka dan di toetoep lagi dengen tida bersoeara oleh satoe orang lelaki jang memake tjelana koetoeng dan badjoe tombeng. Ia berdjalan dengen perlahan di samping roemah sampe di serambi belakang.

„Toean Said,“ kata orang itoe.

Joesoef terprandjat.

„Siapa kaoe.“

„Saja, toean,” sahoet itoe orang sembari madjoeken dirinja dari tempat gelap ka tempat terang.

„Ali?” tanja Joesoef.

„Betoel, toean.”

„Ada apa dateng malem-malem.”

„Ada sedikit oeroesan toean.”

„Mari sini, oeroesan apa?” „Saja permisi maoe tanja toean, apa boenjinja ini soerat,“ kata Ali sembari hampiri Joesoef dan serahken satoe goeloeng kaen toewa jang dilepit dengen rapi.

„Soerat apa ini?” tanja Joesoef sembari boeka itoe goeloengan.

„Saja koerang taoce, toean,” sahoet Ali. „Tapi saja taksir ada soerat djlmat. Saja kapingin taoe apa betoel ada begitoe. Kaloe betoel saja maoe goenaken boeat bikin semboeh saja poenja istri jang sedeng sakit.”

Joesoef batja itoe soerat jang tertoelis dalem bahasa Arab di atas sapotong kaen toea. Ia kaliatan katarik hati.

„Dari mana kaoe dapet ini soerat?” tanja Joesoef sembari memandang pada Ali jang doedoek di atas dijoebin sambil senderken badannja pada tembok.

„Ja, akoe senang kaoe djadi beroentoeng, Ali,“ kata Joesoef dengen mesem.

Ali laloe permisi poelang.

Joesoef berbangkit dari tempat doedoeknja aken masoek ka dalem. Di samping pintoe, teraling. oleh kaen pedengan pintoe, Joesoef dapetken Marsina mengoempet.

„Kaoe bikin apa disini, Marsina ?” tanja Joesoef dengen heran.

„Saja dengerin toean bitjara sama Ali.“ „Ja, Ali bakal djadi kaja.”

„Kenapa toean tida maoe bikin saja djadi kaja.”

Joesoef diam, ia tida mengarti omongannja Marsina.

„Kenapa toean tida maoe simpen itoe resia boeat toean sendiri. Ali tida bisa batja itoe soerat, toean boleh djoestaken soerat itoe tida bergoena, dan dengen begitoe kita sendiri boleh gali itoe harta.”

„Oh! kaoe poenja hati tida baek, Marsina. Ali jaang diberkahken Allah, boekan akoe dan boekan kaoe.”

„Tapi kita bisa dapet itoe berkah kaloe sekarang, sabelonnja Ali sampe di itoe mesdjit roesak, kita soeda gali lebih doeloe.”

„Ali nanti taoe kita jang gali, sebab ia tida boeka itoe resia boeat laen orang. Ia nanti bikin pembalesan.”

„Kita tinggalken peti kosong. Ia toch memangnja tida terlaloe pertjaja itoe soerat sesoenggoenja benar.”

„Tapi akoe tida maoe berboeat begitoe, Marsina. Akoe merasa tioekoep dengen akoe poenja kakajaan.”

„Saja merasa tida tjoekoep,” sahoet Marsina dengen oering-oeringan, „sebab toean tida maoe beliken itoe giwang dan peniti.”

Ia teroesken perdjalanannia dengen tjepet ka itoe mesdjit, dalem hatinja meminta pada Allah soepaja ia dilindoengken dari segala godaan iblis, sedeng moeloetnja tida brenti membatja bebrapa djampean.

Achirnja Ali sampe di itoe mesdjit. Dari pintoe samping ia lantas bisa dapet liat itoe soemoer, dan dari pinggiran soemoer ini ia laloe bertindak lima langka ka samping sabelah kanan dari satoe koeboeran, di tempat mana betoel djoega Ali dapet liat itoe batoe pesegi jang sekarang soeda ditoetoepi oleh roempoet-roempoet. Dengen tangan sadja batoe tida nanti dapet dikiserken, tetapi Ali ada bawa linggis, maka dengen itoe perkakas ia bikin batoe itoe tergoeling. Ali tjoba teken itoe tanah jang tadinja ditindi oleh batoe dan ia rasaken kakinja jang meneken djadi ambles, la merasa amat girang, harepannja djadi besar. Sekarang ia ambil itoe patjoel, dengen apa laloe gali tanah itoe sampe satoe kaki dalemnja. Selagi menggali, patjoelnja ia rasaken ada membentoer apa-apa jang keras, Itoelah Ali doega tentoe ada peti jang terseboet dalem soerat testament. Ia lempar itoe patjoel dan dengen tangannja, kedoek tanah jang masi menoetoepi pada itoe lobang. Tangannja lantas dapet memegang pada itoe peti, jang dengen penoeh kagirangan ja laloe tarik ka atas, Satoe peti pasegi sedikit pandjang sekarang ada di hadepannja. Peti itoe ada terkontji, tapi dengen gampang bisa diboeka dengen satoe kali dongkrek sama lingis. Tatkala toetoepnia diboeka, lantas djoega ada kaliatan bebrapa kantong jang berisi oewang. Sala satoe kantong itoe, Ali sigra boeka dan isinja poetih-poetih ada kaliatan di sinarnja boelan. Lagi satoe kantong Ali boeka dan isinja mera-mera, jaitoe oewang emas ringgitan dan perakan. Ali rasaken kapalanja poesing, matanja berkoenang-koenang oleh kerna baroe perna dapet liat oewang jang begitoe banjak. Ia doedoek adepken itoe peti dengen peloek dengkoel sebagi saorang kasimah, bingoeng; tida taoe apa jang ia misti berboeat. Sakoenjoeng-koenjoeng Ali denger soeara prampoean tertawa.

Pada soeatoe pagi ada dateng saorang prampoean di roemahnja Katma di Kebon Djahe dan minta Katma dateng di roemah madjikannja prampoean toe jang tinggal di Tjiwaringin. Katmatrima itoe panggilan, tetapi oleh kerna kerdjainnja sendiri di roemah masi terlaloe banjak, maka ia titahken Ali boeat pergi ka itoe roemah di Tjiwatingin. Ali ikoet itoe prampoean dengen bawa bebrapa perkakas jang perloe.

Ia diadjak masoek ka dalem satoe gedong ketjil jang tertoetoep genteng dan berdinding bilik. Matjemnja gedong ini maskipoen ketjil, tetapi ada amat moengil. Ia poenja pelataran jang sedikit lebar ada penoeh dengen poehoen-poehoen boengah jang bagoes, sedeng perabotan roemah di pertengahan loear dan dalem, samoea ada serba netjis.

Itoe boedjang prampoean laloe masoek ka dalem, sedeng Ali menoenggoe di loear. Tida lama boedjang itoe kaloear kombali dan oendjoeken pada Ali bilik sabelah mana jang maoe dibetoelken.

„Poekoel sembilan toean nanti dateng dan nanti oendjoek bilik bagian jang mana lagi maoe di bongkar,“ katanja itoe boedjang prampoean.

Ali moelai berkerdja, njonja roemah kaliatannja lagi ripoeh oeroes masakan di dapoer.

Waktoe maoe boeka itoe bilik jang soeda roesak, Ali liat ada satoe lemari katja jang moesti dikiserken, Hal ini ia bri taoe pada itoe boedjang prampoean dan iaorang berdoea Jaloe kiserken lemari itoe. Waktoe dikiserken, pintoenja lemari itoe jang tida terkontji djadi terboeka. Ali liat saklebatan isinja lemari itoe dan djadi terkedjoet koetika dapet liat satoe peti item. Ia kaloearken peti itoe dengen tingka jang amat kapingin taoe dan boeka toetoepnja. Disitoe tida ada terisi apa-apa, salaennja bebrapa kantong kaen jang soeda toewa.