Itoe soldadoe menoeroet prenta.
„Ho, tapi itoe terlaloe!" hertog bertreak, „akoe nanti kasi pladjaran pada kau."
Grimaud kasi hormat dengen angkat tangannja sebagi satoe officier hormat kawannja.
„Toean, spion, akoe nanti bikin pata kau poenja kaki!" kata hertog jang soeda djadi sanget mara.
Grimaud kasi hormat lagi, tapi moendoer satindak.
„Kau djadi mata mata," kata poela hertog, „akoe sendiri nanti tjekek kau sampe mati."
Grimaud kasi hormat dan moendoer lagi lebi djaoe.
„Dan itoe perkara," kata hertog jang soeda djadi sanget mara, „akoe moesti kerdjaken sekarang djoega."
Dan dengen kepelannjà ditoedjoeken moekanja Grimaud hertog dateng hampirken padanja. Grimaud toelak itoe pendjega kaloear pintoe dan koentji pintoenja dari dalem.
Iteo koetika ia rasa kadoea tangannja hertog soeda pegang dengen kras ia poenja poendak, tapi ia tiada bertreak, in tjoema taro djeridjinja di depan bibirnja dan dengen swara plahan ia kata:
„Diam!"
Itoe tanda serta moekanja Grimaud jang tersenjoem soeda bikin hertog djadi sanget heran dan sedeng hertog bengong pikirken perboeatannja itoe orang, Grimaud kasi kaloear dari sakoenja satoe soerat ketjil jang ia seraken pada hertog.
Hertog de Beaufort djadi semingkin heran, koetika ia kenalken toelisannja itoe soerat dan ia kata:
„Dari njonja hertog de Montbazon ?"
Grimaud manggoet.
Dengen tjepet hertog robek envelopnja dan batja dengen gemeter itoe soerat jang boenjinja begini:
„Toean hertog !"
Orang jang bawa ini soerat pada kau, kau boleh pertjaja betoel, ia ada penggawenja saorang bangsawan dari kita poenja fihak, jang brani tanggoeng kasetia'annja ia poenja orang. Itoe orang soeda soeka masoek bekerdja pada politie, soepaja, bisa dipakerdjaken dalem pendjara Vincennes boeat bantoe dan atoer, soepaja kau bisa lari dari itoe tempat. Kita tiada brentinja berdaja boeat menoeloeng pada kau.