Bwee Hoa

Bwee Hoa

Oleh: CHEN WEN ZWAN.

I.

N JONJA Jansen, istrinja toean tanah Pasir-Angin, sedeng enak londjorken dirinja di korsi pandjang di bawah poehoen tjemara jang toemboeh di depan gedongnja. Satoe medja ketjil atas mana ada theekwan dan koewee-koewee ditaroh di dampingnja dan sebentar-bentar njonja Jansen iroep iapoenja thee boeat kemoedian londjorken lagi dirinja sambil memandeng tida bosennja pada itoe goenoeng-goenoeng biroe jang berombak-ombak di depan matanja.

„Mevrouw...........!“

Njonja Jansen terkedjoet sedikit, tapi koetika ia meliat pada Djoen Kong jang setjara mendadakan berdiri di blakangnija, ia djadi tertawa.

„Kaoe bikin kaget padakoe, lootia,” kata njonja Jansen sembari berbangkit dengen manis boedi, ,dan kenapa kaoe tarik moeka begitoe asem, apa banjak pendoedoek tida bajar tjoekenja?” Djoen Kong dengen istrinja iapoenja madjikan selaloe bitjara Blanda, kendatipoen Djoen Kong bitjara tida begitoe lantjar.

„Tentang pendoedoek, mevrouw”, kata poela Djoen Kong dengen masih sadja moekanja merengoet, „saja tida poesing, di bawah satoe toean tanah jang begitoe baek seperti toean Jansen pendoedoek tida banjak tjerewet, tapi . . . . . . . . . . jang saja boeat pikir. . . . . . . . . . jang. . . . . . . . . . saja poesingken. . . . . . . . . .”

Njonja Jansen masih sadja memandeng dengen tersenjoem pada itoe lootia dari Pasir-Angin.

„Kom, Djoen Kong, apatah jang kaoe poesingken,” mengandjoerken njonja Jansen, „dan apa tah jang bikin kaoe begitoe bersangsi?”

Sesoedahnja berdiam sebentar Djoen Kong baroe berkata lagi: „Jang saja boeat poesing, mevrouw, adalah sajapoenja istri!”

Mendadakan njonja Jansen djadi tertawa bekakakan, hingga kita poenja lootia moekanja djadi merah.

II.

D I dalem kantoran dari tanah partikoelir Pasir-Angin Tek Bie sedeng bekerdja dengen giat. Ia doedoek hadepin medja toelis dengen satoe staat besar, tjatetan pembajaran koeli-koeli jang ia moesti oeroes. Sebentar-bentar Tek Bie melongok dari djendela jang ada di dampingnja dan mengawasin pegoenoengan Tjibodas jang indah. Ia menoelis, tapi pikirannja melajang dan merasa rindoe.

Sekoenjoeng-koenjoeng satoe boekoe terlempar dari loear djendela dan djatoh di atas medja toelisnja, hingga Tek Bie berlontjat lantaran kaget dan lompat ka deket djendela. Tapi waktoe ia dapetken siapa adanja di loear djendela, Tek Bie poenja moeka mendadakan djadi bersemoe merah, ia merasa girang tertjampoer maloe. Di sana Bwee Hoa dan njonja Jansen tertawa terpingkel-pingkel, sedeng Tek Bie tida taoe apa jangia moesti berkata.

„Slamet pagi. . . . . . . . . ., Bwee!” kata Tek Bie dengen rada goegoep.

„Kaoe ada onbeleefd, Bie,” menggoda njonja Jansen. „kaoe moestinja kasih tabe lebih doeloe pada saja, boekan?”

„Slamet pagi. . . . . . . . . . mevrouw!”

Itoe doea orang prempoean masih sadja tertawaken pada itoe pemoeda jang keliatan kikoek. Tapi maski begitoe matanja Tek Bie meloeloe ditoedjoeken dengen bersinar pada Bwee Hoa. Ini poen dapet diliat oleh njonja Jansen jang teroes menggoda.

„Liat sadja, liat sadja boeat pengabisan kali, Bie,” kata itoe njonja toean tanah,” kaoe moesti taoe, jang Bwee sekarang soedah dipinggit.”

Mendenger itoe goda'an baek Tek Bie, maoepoen Bwee Hoa djadi toendoeken kepalanja. Tapi Bwee Hoa selang satoe sa'at berkata poela:

Tapi di loear doega'an njonja jang baek itoe mendadakan Bwee Hoa menangis sesegoekan. Ia peres iapoenja aer mata dengen iapoenja sapoe tangan. Hatinja njonja Jansen djadi mentjelos. Kebetoelan marika soedah sampe di depannja gedong besar. Njonja Jansen laloe pimpin Bwee Hoa ka dalem, doedoekin padanja di satoe divan dan peloek padanja.

„Kom lieveling, kaoe ada simpen resia apa-apa. Toempahkenlah isi hatimoe di depannja kaoe poenja sobat toea ini!”

Tapi aer matanja Bwee Hoa masih sadja mengalir dengen deres, membasahin pipinja jang poetih. Bwee Hoa mengglendot di dadanja itoe njonja, seperti djoega di sitoe ia mentjari perlindoengan. Njonja Jansen jang soedah tjoekoep pengalaman taoe, jang aer mata ada penawarnja kesedihan, biarken Bwee Hoa menangis.

Sesoedahnja itoe njonja Jansen menanja lagi:

„Kenapa, Bwee, kaoe sebentar bersinar seperti matahari dan mendadakan begitoe gelap goelita?”

Dengen masih sadja sesegoekan Bwee Hoa berkata dengen poetoes-poetoes.

„Saja moesti menikah, mevrouw, moesti menikah!” kata itoe gadis.

„Tapi semoea orang toch moesti menikah, Bwee.”

„Tapi, mevrouw saja maoe didjadiken goendiknja orang!”

Njonja Jansen poenja hati seperti tertoesoek. Bwee, itoe anak jang ia kenal dari ketjil dan jang ia blakangan tjintaken seperti anak sendiri, moesti djadi goendiknja orang. Oh, bagimanatah pikirannja Hong Nio?

„Tjoba toetoerken satoe persatoe, Bwee,” kata njonja Jansen sambil peloek lebih keras itoe gadis,” barangkali saja bisa berboeat apa-apa boeat kaoe.”

„Saja dibrentiken sekolah lantaran saja dilamar oleh kapitan Be Goat Soe dan ini kapitan ssbetoelnja soedah mempoenjai istri, mevrouw! Iboe saja soedah trima itoe lamaran.”

„Tapi kaoe poenja ajah, Bwee, jang dapet pladjaran Barat, apa katanja?”

Tapi tjoema njonja Jansen sendiri jang itoe hari poen dateng menjambang taoe isi hatinja itoe nona penganten jang berdoedoek di sana seperti patoeng dengen iapoenja pakean jang berat dan grombongan dengen moeka ditoetoepin dengen sematjem sekosol jang djarang. Betoel Bwee Hoa keliatan lebih eilok dengen itoe pakean, berbeda dengen kaloe ia berpakean Europa, tapi sekarang Bwee Hoa keliatan seperti patoeng dan boekan sebagi manoesia hidoep. Ia poenja mata ditoendoekin ka tanah dan setiap kali ia hendak meliat ka laen djoeroesan, mah tjomblang kasih inget, jang nona penganten selaloe moesti liat ka tanah, seperti nanti ia poen haroes menaloek dalem segala apa pada iapoenja soeami jang bakal mendjadi iapoenja toean dan madjikan.

Tapi kendatipoen begitoe Bwee Hoa toch bisa tjoeri liat, bahoea di itoe roeangan, di antara itoe tetamoe jang berdjoebelan, jang dateng lebih banjak boeat makan enak dari pada boeat kasih slamet pada penganten, terdapet iapoenja sobat-sobat njonja Jansen dan toeannja dan.......... Tek Bie!

Pengrasa'an apatah itoe jang ia kandoeng pada Tek Bie! Ia poenja perhoeboengan dengen itoe pemoeda melaenken dari pindjem dan memindjem boekoe, laen tida. Satoe sobat jang seliwatan, tapi toch, tapi toch? Di satoe podjok Tek Bie berdoedoek dengen toendoekin moekanja jang poetjet, ia keliatan sama sekali tida bergoembira. Apatah jang Tek Bie rasaken itoe waktoe?

Sesoedahnja berkata begitoe Goat Soe berlaloe dan betoel sadja tida antara lama Bwee Hoa denger soeara kreta jang kloear dari itoe gedong.

Satoe malem jang gelap.

Angin menioep keras, sedeng oedjan toeroen seperti ditoeang-toeang. Sebentar-bentar kilat berklebetan. Di sekiternja tjoema soeara oedjan dan angin kedengeran, tempo-tempo djoega soeara gloedoek.

Bwee Hoa berdoedoek sendirian di dalem kamarnja dengen membatja boekoe. Ia begitoe ketarik dengen djalannja tjerita di dalem itoe boekoe, hingga ia tida denger grendel pintoe dipoeter dan pintoe terboeka, Koetika angin menioep ka dalem, Bwee Hoa menengok ka pintoe. Di sana ada satoe orang jang kroedoengin dirinja dengen mantel item. Bwee Hoa ampir bertreak lantaran kaget, tapi itoe orang boeka mantelnja dan topi koeploek jang ia pake jang soedah mendjadi basah lantaran aer oedjan.

„Engko Tek Bie!”

Sebentar itoe orang jang boekan laen orang adanja dari pada Tek Bie berdiri seperti patoeng di itoe pintoe jang terboeka, kemoedian ia toetoepin lagi dengen plahan dan poeter koentjinja.

Bwee Hoa merasa séperti djoega ia mengimpi. Apa itoe betoel ada Tek Bie jang berdiri di sana? Apa ia tjoema mengimpi sadja?

Tapi dalem sekedjab itoe orang menghampiri dan ia berada dalem peloekannja Tek Bie. Ia rasaken bibirnja Tek Bie jang anget beradoe dengen bibirnja sendiri, ia rasaken bibirnja Tek Bie mentjari iapoenja pipi, mata, djidat. Bwee Hoa seperti loepa-loepa inget. Ia rasaken dirinja terajoen dalem satoe awan kebroentoengan jang adjaib, soeatoe perasa'an jang ia baroe pernah rasaken.

„Engko Tek Bie, kaoe.....?” ia berbisik, ia meremken matanja dan teken kepalanja di dadanja itoe orang jang ia tjintaken.