Kutipan Bwee Hoa

„Ja, tapi, tapi toch boeat Bwee Hoa jang dapet didikan Barat kaoe mengerti sendiri, bagimana ia bakal rasaken itoe?”

„Bwee Hoa tjoema mendjadi korban dari perlintasan djaman. Bwee Hoa mewakilken Tionghoa jang baroe, iboenja mewakilken Tionghoa lama.

Ada satoe waktoe jang ini doea aliran nanti saling mengerti, sesoedahnja disaring dan disaring lagi oleh djalannja sang tempo.”

Ia sekarang tida berpakean grombongan lagi, ia pake iapoenja pijama jang ia dapet persen dari njonja Jansen, satoe pijama soetra merah, jang sepan betoel pada toeboehnja jang molek. Ia beresken iapoenja koffer dan tjit iapoenja aer mata jang masih basah di mana pipinja.

Bwee Hoa masih terlaloe moeda aken berdoeka terlaloe lama dan ia masih gelap goelita terhadep pada apa jang dirinja aken moesti alamken kemoedian.

Ia ambil satoe boekoe dari koffernja, itoe boekoe ada pengasihannja Tek Bie. Boekoe itoe berkalimat „Schuld en Boete” karangannja Destojewsky, ia boeka-boeka lembaran itoe boekoe. Hatinja bergoemeter, koetika denger tindakan sepatoe mendatengin ka djoeroesan kamarnja.

Ja, pembalesan nanti Bwee Hoa lakoeken, biar apa djoega nanti kedjadian. Dan poen baroe sekarang ia merasa jang ia sebetoelnja menjinta pada Tek Bie. Tapi bagimana ia moesti dapetken lagi perhoeboengan dengen itoe pemoeda, sedeng pada orang toeanja sendiri ia soesah boeat berhoeboengan ?

Tapi hati jang menjinta timboelken akal.

Bwee Hoa inget jang pada iapoenja harian nikah, Tek Bie telah beriken satoe boekoe padanja, itoe boekoe dari Destojesky jang doeloean poen menerbitkan amarahnja kapitan Be Goat SOe.

Goea poenja perhoeboengan dengan ia tida lebih dari sobat jang baek. Biarpoen bisa djadi di dalem dasar hati kita ada bersemi itoe api pertjinta'an, tapi belon satoe patah perkata'an tjinta keloear dari kita poenja moeloet.

Kita poenja perasa'an ini ada terlaloe soetji boeat kena dibikin noda oleh perkata'an.

„Waktoe loe ambil goea, sebetoelnja goea niat bersetia pada loe, biarpoen sama sekali goea tida merasa tjinta pada loe. Goea tjoema toeroetin kemaoeannja goea poenja iboe dan goea soedah pasrah goea poenja nasib. Pendeknja goea maoe menghamba dan bersetia pada loe!

Itoe semoea goda'an seperti tida terdenger sama sekali oleh Tjioe Ling. Tapi mendadakan ia bangoen dari tempat doedoeknja dan berkata dengen ewa:

„Goea bentji sama loe semoea! Loe orang ini tjoema roepanja sadja manoesia.

Loe pake pakean bagoes dan dasi jang indah, tapi loepoenja hati lebih boeroek dari binatang!”

„Bwee Hoa oepamanja,” kata poela Tjioe Ling, „sebab ia djanda dan sebab loe orang denger orang poenja lida boesoek, jang ia telah berkendak dengen seorang lelaki laen, loe orang lantas anggep jang itoe ada loe orang poenja kans boeat tjitjipin djoega madoenja.

Kaloe loe orang meliat seorang prempoean jang ampir djatoh, loe orang boekan toeloeng atawa pindahken ka tempat jang lebih aman, tapi loe orang djorokin baroe merasa poeas, kaloe itoe prempoean soedah djatoh betoel-betoel di dalem loempoer!

Di sitoe itoe prempoean terasing dan tertjela oleh sedoenia, mati tida, hidoep poen tida dan siahwee kita djidji pada orang-orang begitoe, sebab siahwee kita ada siahwee dari dewadewa atawa manoesia-manoesia setengah melaikat!

„Kenal sedikit,” saoet Goat Soe dan di dalem hatinja tida abis berpikir, bagimana Tek Bie bisa djadi mantoenja itoe fabrikant hartawan pada kekaja'an siapa hartanja Goat Soe tida bisa menempil.

Tapi nasib manoesia ada seperti ombak di laoet, sebentar terdampar ka batoe karang jang keras, sebentar teroembang-ambing di tengah laoetan, nanti tenggelem, nanti timboel.

Begitoepoen dengen perdjalanannja Tek Bie. Koetika ia dengen perasa'an maloe meninggalken Pasir-Angin, ia begitoe miskin seperti tikoes koeroes.

lapoenja Koh dan I'ih sendiri merasa takoet deket padanja, begitoe bengisnja pergaoelan hidoep kita.

Orang jang terpleset didjorokin orang jang djatoh ditendang!

Boengah mekar tjoema boeat rontok, begitoepoen penghidoepan jang moesti dialamken oleh prempoean sebagi Bwee Hoa. Tawon dateng, tawon ambil madoenja seabisnja madoe itoe abis, boengah itoe tinggal menoenggoe rontoknja.

Ia ada sebagi boengah jang menjiarken wanginja ka segala ploksok jang menarik segala tawon dan koembang boeat dateng padanja, tapi waktoe itoe liwat sebagi aer di soengei jang mengalir boeat tida kombali lagi.

Kedoedoekan boengah latar tida beda dengen orang berada di tangga, tjoema soeatoe tangga jang aneh, di mana orang bisa semangkin toeroen, tapi tida bisa semangkin naek.

Pada waktoe sedeng mekarnja tjoema orang-orang hartawan jang bisa membajar jang dapet mengoendjoengin Bwee Hoa, tapi tingkatan jang dateng semangkin lama djadi semangkin merosot deradjatnja.