Tao Teh King

TANDA BOEAT MENGENALIN TAO.

Tao jang bisa dibitjaraken dengen perkataän boekan ada Tao sedjati jang bersifat kekel.

Nama dari saroepa sifat jang orang bisa seboet, boekan mengoendjoek sifat jang betoel dan kekel.

Apa jang soedah ada sablonnja tertjipta Langit dan Boemi itoelah dinamaken Kakosongan.

Sasoedahnja mendjadi Ada dan dibri nama, ia ada djadi Iboe dari segala benda.

Maka orang-orang jang soedah terbebas dari iketan doenia toedjoeken perhatiannja pada resia dari itoe Kakosongan, sedeng orang-orang jang masih teriket pada doenia tjoemah meliat koelit loearnja sadja.

Itoe Kosong dan Ada, tjoemah berbeda dalem nama sadja, sedeng atsalnja satoe roepa.

Ini persama'an atas apa jang kaliatan bertentangan, akoe namain satoe resia, ― resia jang sanget dalem sekalih, pintoenja boeat mengenal karohanian, jang membikin bingoeng dan kesima.

⁂

Katerangan:

BERKAHNJA MELOEPAKEN DIRI SENDIRI.

Langit dan Boemi doea-doea berada lama sekalih. Sebabnja kenapa bisa terdjadi demikian jaitoelah lantaran Langit dan Boemi tida pikirin soeal pandjang atawa pendek oemoer. Dengen begitoe marika terpelihara dalem tempo jang sanget lama.

Orang boediman, jang tida pikirin dirinja sendiri, ada teritoeng jang paling besar dari sekalian manoesia, dan maskipoen tida perhatiken kapentingan bagi dirinja tida oeroeng ia tinggal terlindoeng.

Dengen sikepnja jang paling tida-kouwkati, ia poen mendjadi saorang jang paling slamet dari semoea.

⁂

Ada penting aken diperhatiken, Lao Tze tida bilang Langit dan Boemi ada bersifat kekel, hanja ia kata sadja berada, atawa bisa tinggal, lama sekalih. Inilah ada tjotjok sama pendapetan dari pengataoean wetenschap djeman sekarang jang soedah menetepken ini Boemi jang kita orang diamin dengen Matahari dan laen-laen planeet kawannja jang mendjadiken itoe tjakrawala (zonnestelsel), satoe tempo aken moesna.

XI.

KAFAEDAHANNJA KAKOSONGAN.

Itoe tiga poeloeh djari-djari dari kekiping rodanja kreta berkoempoel mendjadi satoe di mana poesernja itoe roda jang kagoena'ainnja ada dari lantaran di bagian tengahnja terdapet satoe lobang kosong pranti masoekin as jang bisa terpoeter.

Kafaedahannja tanah jang didjadiken boejoeng, ada bergantoeng pada itoe bagian jang kosong di sablah dalemnja.

Pintoe dan djendela djadi bergoena sebab disitoe ada terdapet lobang boeat kaloear dan masoek apa-apa.

Kagoena'annja satoe roemah ada dari lantaran kaloeasan pada iapoenja bagian-bagian jang kosong.

Maka itoe maskipoen boleh djadi kahidoepan (atawa perwoedjoetan) ada mengandoeng kabaekan, tapi tjoemah adanja itoe kakosongan di dalemnja jang membikin ia djadi bergoena.

⁂

Disini Lao Tze oetaraken satoe peladjaran penting sekalih tentang harga dan kafaedahannja kakosongan. Satoe kekiping roda tida nanti bisa terpoeter, hingga mendjadi tida ada goenanja sama sekalih, djikaloe di bagian tengahnja, di mana djari-djarinja berkoempoel, tida terdapet saboeah lobang boeat kasih masoek as.

Akoe berada sendirian di dalem kadoesoenan ; akoe tida mempoenjai kainginan jang besar, tida dapetken kamadjoean, hanja tinggal sabagi satoe anak ketjil.

Akoe ini hanja satoe toekang bergelandangan, saorang jang kesasar, satoe anak jang tida mempoenjai tempat tinggal, hingga tida taoe dimana moesti rebahken kepalanja.

Laen laen orang ada poenjaken banjak segala apa, tjoemah akoe sendiri jang telah kailangan semoea.

Laen-laen orang mentèrèng dengen kagoemilangan dari kapandeannja, tjoemah akoe sendiri sadja jang tinggal soerem.

Laen-laen orang semoea pinter memereksa dan mentjari taoe ; tjoemah akoe sendiri sadja

jang tida perdoeliken apa-apa.

Akoe bergontjang seperti laoetan, jang bergerak teroes dengen belon perna mengaso.

Semoea orang bisa Iakoeken ini dan itoe jang berfaedah; hanja akoe saorang diri jang tida bekerdja dan tida mempoenjai djasa.

Akoe sendiri sadja jang berbeda dan terpisah dari orang banjak, tetapi akoe merasapoeas aken tinggal dalem kamoelja'an di dadanja akoe poenja Iboe !

⁂