Liem Thian Hok

1

Dalem provincie Kei-tang di Tiongkok, ada bebrapa afdeeling, antaranja ada satoe jang dipanggil Bwe-koan (Ke-eng-tjhioe); sebla wetannja menjamboeng pada provincie Hok-kian, sebla kaler bisa teroes ka provincie Kang-saij, tempo karadjaan Tong dan Song rahajat negri di itoe tempat telah terserang roepa-roepa penjakit, tetapi satelah ini penjakit berlaloe, keadaan dalem Bwe-koan berbalik djadi mahmoer, serta dagangan semingkin hari bertamba madjoe, hingga dari sitoe bisa dibikin perhoeboengang dagang ka plaboean Shoa-tow.

Liwat kira-kira doea-tiga ratoes paal djaoenja dari Shoa-tow ada terletak satoe kota besar jang dipanggil Siong-kouw-tin. Kota itoe mempoenjai banjak pendoedoek dan dalem hal perniagaan ada amat madjoe serta banjak berdiri toko-toko besar. Sala satoe diantara ini toko ada satoe tokonja Liem Si An jang paling terkenal. Liem Si An lantaran ada satoe soedagar jang manis boedi bahasa dan pinter, maka tiada heran blon berapa lama ia berniaga di itoe tempat, soeda beroentoeng bisa diriken poela satoe toko di Negri Siam.

Kaloe Liem Si An pergi ka Siam boeat oeroes perniagaannja, dalem oeroesan toko di Siongkouw-tin ia seraken pada iboenja jang dipanggil Tan Si berdoea istrinja bernama Lie Si terbantoe dengan bebrapa koeli. Ini iboe dan istri ada tinggal di Bwe-koan.

Toko Liem Si An di negri Siam djoega ada sanget madjoe, lantaran mana ia tiada boleh tinggalken sablonnja dapet orang kapertjajaan. Itoe sebab dengen idzin iboe dan istrinja, ia telah menika poela pada satoe gadis Siam boeat rawat padanja di sana bernama Hek-kat.

Koetika Liem Si An beroesia ampat poeloe taon, Lie Si, istrinja telah melahirken satoe anak lelaki dengen slamet, dan boeat ini hal laloe dikasi kabar dengen telegram pada Liem Si An jang djoestroe di itoe koetika berada di negri Siam.

Pandjangnja kali Bwe-koan ada kira-kira tiga ratoes paal, terapit oleh goenoeng-goenoeng, aer ada terlaloe deras. Di ini tempat orang tiada begitoe koeatir, tjoema jang „dimaloein" kaloe soeda moelai lintasin kali di Hong Laij Toa, penoempang-penoempang moelai djadi ketjil hatinja, kerna disitoe ada banjak batoe-batoe karang besar jang menondjol dimoeka aer hingga kaloe toekang praoe meleng sedikit maenken kemoedi, soeda boleh dipastiken itoe praoe kena kabentoer dengen itoe batoe-batoe jang oleh natuur brangkali sengadja ditjiptaken tjoema sebagi periasan kali terseboet, sebab maski perdjalanan disitoe ada sanget berbahaja, tetapi ada mengasi pemandangan jang menjenangken sekali.

Sebagimana biasa kaloe praoe moelai sampe disitoe, moesti goeloeng lajar dan goenaken kedjen boeat liwatin itoe tempat. Penoempang-penoempang moesti doedoek ati-ati soepaja tiada terlempar kalcear dari praoe, kaloe ini kandaran aer oepamanja kena bentoer karang sedikit keras dan praoe djadi bergontjang.

Itoe waktoe Thian Hok sedeng doedoek adepin moeka kali. Ia liat batoe-batoe karang jang menondjol sagede-gede kerbo, kadengeran soearanja aer mengalir ada terlaloe berisik. Didalem hatinja ia berpikir, kaloe seandenja ini praoe terbalik disini tiada sapotong menoesia bisa katoeloengan, maka semingkin ia pikirin djadi berbalik takoet, lantes inget pada iboenja diroema jang di iloe waktoe blon taoe ia lagi kerdja apa, dengen tiada taoe pada sang anak jang sedeng adepin djalanan jang berbahaja.

„Kaloe ini praoe terbalik," berpikir Thian Hok didalem hati,„tentoe kita djadi setannja ini kali, dan iboe-koe apabila dapet taoe jang akoe soeda mati, boeat mana maski ia tangisken padakoe sampe kaloear aer mata dara toch pertjoema-tjoema sadja.

Ini prempoean moeda liwat disampingnja Thian Hok dengen plahan, membikin hatinja Thian Hok djadi berdebar-debar. Dengen tiada disengadja Thian Hok menoleh padanja, dimana djoestroe ini prempoean poen sedeng menengok ka samping dan disitoe sorot ampat mata telah beradoe satoe sama laen dan kasoedahannja saling memandang.

Ini prempoean sembari mesem laloe berdjalan lebi tjepet, tinggalken Thian Hok bengong terlongong-longong. Berdjalan tiada brapa djaoe kombali ia menengok ka blakang dan kasi liat mesemnja lagi jang manis.

Thian Hok rasaken kepalanja poejeng, hatinja bergontjang keras, tiada taoe apa ia moesti bikin di itoe koetika, selaennja termenang menoeng saorang diri, liatin itoe prempoean menikoeng disamping kamar dan linjap dari pemandangan.

„Itoe sekawan prempoean kenapa tiada ada keliatan lelakinja jang anterin ?" menanja Thian Hok didalem hati satelah soesoet kringet dengen sapoe tangan. „Perloe apa marika belajar langka laoetan? Kaloe akoe denger omongnja, ternjata marika ada dari laen provincie, kerna apa jang marika omongken akoe tiada taoe."

Sedeng lagi asik berpikir, Thian Hok tiada rasaken kaloe siang plahan-plahan soeda terganti dengen malem, kerna, matahari soeda moelai silem disela-sela goenoeng dan lampoe-lampoe electris dikapal moelai menjala boeat gantiken terangnja matahari soepaja didalem kapal tiada kagelapan, hawanja ada sanget panas; seperti djoega orang tidoer dibikin mendoesin dengen mendadak, Thian Hok boeroe-boeroe masoek ka kamarnja aken toekar pakean tipis soepaja tiada terlaloe kagerahan. Penoempang-penoempang jang blon biasa belajar ditenga laoetan di itoe koetika sanget koeatir lantaran meliat ombak besar damparin kapal, hingga ada banjak antaranja jang moenta-moenta lantaran terserang mabok laoet.

Di antara tempat jang paling rame, adalah djalan raja jang berdiri toko Hiap Tjiang. Didepan itoe toko ada keliatan berdoedoek Thian Hok bersama koeli koelinja.

Thian Hok dapet liat ada banjak orang plesiran dengen di iringken roepa roepa tetaboean, hingga djalar raja djadi sesak olehnja. Soenggoe Thian Hok ada doedoek meliat segala permaenan jang liwat, tetapi roepanja ia tiada begitoe perhatiken, kerna matanja sabentar bentar awasin pada rombongan orang prempoean, kadang kadang dengen soeara menggrendeng ia berkata:

„Dalam sebegitoe banjak orang, kenapa akoe tiada liat padanja. Tiada boleh djadi kaloe ta tiada djalan-djalan.“

Koetika sedeng menggrendeng, dari djaoe ia dapet liat sarombongan prempoean moeda djalan mendatengin. Boeroe boeroe ia berdiri ia intjerken matanja ka itoe djoeroesan, tetapi sebegitoe lekas itoe rombongan liwat, Thian Hok berkata dengen soeara sedikit keras: „Ha“, boekannja!“ hingga koeli-koelinja Thian Hok pada menengok, merasa heran meliat lakoenja Thian Hok seperti ajem maoe bertelor.

Thian Hok baroe taoe itoe soeara ia kaloearken terlaloe keras, maka soepaja itoe koeli koeli tiada djadi tjoeriga, sengadja Thian Hok adjak ngomong tentang ramenja pesta jang dibikin dan banjak orang jang plesiran.

Sakoenjoeng koenjoeng Thian Hok dapet liat saorang prempoean dengen berdandan perlente djalan liwatin depan toko Hiap Tjiang. Disampingnja ini prempoean ada berdjalan saorang lelaki tanggoeng dengen memegang saroepa bendera jang tertoelis tiga hoeroef besar. Orang banjak liatin ini prempoean berdjalan dengen roepa angkoe, pada berkasak koesoek. Ada jang toendjoek dan berkata:

„Ini dia kembangnja kota Siam. Banjak soedagar pada terbalik lantaran dia, djoega tiada koerang disemblanja kongtjoe kongtjoe jang terpleset lantaran ketjantikannja hingga loepa daratan."

Koeli koelinja Thian Hok meliat itoe prempoean poen pada bengong terlalongong. Sala satoe antaranja berkata:

Pada soeatoe hari, sedeng Koei Hoa toenggoein Thian Hok dateng, Tjit Mah berkata:

„Koei Hoa, boeat apa kau toenggoein pada Thian Hok, jang maski betoel ia ada koeasa dari toko Hiap Tjiang, toch kaloe bapanja poelang, Ia tiada begitoe laloeasa lagi. Paling baek kau toeroet kahendaknja Tan Sam itoe soedagar jang rojal, maski ada sedikit toea, asal doeitnja masoek kantong, maoe apa perdoeli? Kaloe akoe poenja pengrasaan, semingkin toea ada lebi baek lagi kau ikoetin, kerna orang toea ada sajang pada bini jang moeda, apa lagi seperti kau, tentoe apa kau maoe ia toeroetin. Ia soeda bilang pada-koe, kaloe kau maoe ikoetin padanja, ia nanti sediaken satoe roema gedong dengen bebrapa boedjang serta kreta boeat pasiar. Jang begimana lagi kau maoe tjari? Dibandingken pada Thian Hok tjoema ia menang moeda, tetapi rojalnja ada kala djaoe.”

„Akoe soeda bilang berkali-kali!” kata Koei Hoa dengen lakoe mara-mara. „Kaloe akoe diboeat bini moeda akoe tiada soedi barang sedikit. Maski Thian Hok sekarang ada bapanja tetapi ia djandji maoe piara akoe satoe sama satoe dengen baek kaloe kamoedian ia soeda djadi koeasa dari toko Hiap Tjiang. Lagi Thian Hok soenggoe orang moeda, tiada begitoe mata krandjang sebagi Tan Sam jang tjeriwis. Djangan sentara boeat didjadiken bini moeda, liat sadja tampangnja akoe tiada soedi!”