Landru

LANDRU Bagian 1. Pemikat prampoean jang paling pande.

Henri Desire Landru, jang berselang belon brapa lama ada djadi boeah toetoernja orang banjak, ada satoe pendjahat jang paling tjerdik dan kedjem, hingga djarang ada bandingannja boeat djeman sekarang atawa poen djeman doelue, kata toean Williams le Queux, poenoetoer dari ini boekoe, kamoedian ia toelis lagi.

Saja poenja pikirah soeda djadi katarik sama perkara tangkepan jang dibikin atas dirinja itoe orang jang penggawakannja ketjil, kepala botak dengen djenggot pandjang dan kadoewa matanja mentjelong ka dalem. Dia itoelah ada terkenal dengen nama Lucien Guillet, tinggal di Parijs, Rue Rochechouart nomer 76, dan soeda ditangkep lantaran tertoedoe lakoeken pemboenoehan. Hal itoe terdjadi pada boelan April tahon 1919 dan bagi saja perkara begitoe ada sanget berharga, kerna samoea orang taoe saja ini ada saorang jang soeka sekali memperhatiken perkara-perkara kadjahatan dan tingka-lakoenja pendjahat-pendjahat.

Toedoehan jang amat banjak dan loear biasa ada didjatoken atas dirinja itoe pendjahat.

Pertama kali saja taoe ini hal, adalah lantaran saja trima satoe soerat dari saja poenja satoe sobat jang doeloenja ada djadi ambtenaar dari satoe pengadilan, dan dalem soeratnja ia ada toelis pada saja begini:

Perkara ini haroes dibilang loear biasa. Dateng di Parijs boeat studig ini perkara. Saja nanti kasi liat pada kaoe soerat-soerat papreksain, jang ada berhoeboeng dengen kadjahatannja ini pemboenoeh dan lebih doeloe saja brani pastiken jang ini perkara aken bikin kaoe djadi amat heran.

,,Djadi pasti, ja?’’ demikianlah Henri Cuchet menetepken pertanja’annja, ,,besok tengahari akoe aken dateng dengen auto boeat ambil kaoe, ja, djantoeng hati ?’’

Kamoedian marika berdoea djalan-djalan di Place de l' Opera dan kamoedian dari sitoe marika laloe menoedjoe ka Grand Cafe, di tempat mana marika berdiam satengah djam lamanja mendengerin muziek jang merdoe, sahabisnja dari sitoe Landru anterin si djantoeng hati poelang ka roemahnja. Esokan paginja Landru bikin persedian boeat samboet datengnja orang jang aken djadi ia poenja korban. Landru ada beli djoega makanan dan kembang-kembang, soepaja itoe samoea bisa bikin girang hatinja njonja Labord-Linie.

Landru sedeng beresken itoe kembang-kembang di atas medja, bersama itoe makanan jang ia beli, tatkala mana dengen sakoenjoeng-koenjoeng ada kadengeran pintoe roemahnja diketok.

Dengen oering-oeringan Landru pergi kaloear boeat liat, siapatah itoe jang mengetok pintoe.

Di atas tangga roemah ada berdiri satoe orang jang berbadan besar dengen koemis warna item.

Di itoe saät Landru merasa keadaännja ada dalem bahaja; ia tahan napasnja dan berdiri sakoetika lamanja dengen tiada berkata apa-apa.

,,Toean Diard’’, kata itoe orang jang dikenal oleh Landru, ,,Akoe ini ada orang politie dan perloenja akoe dateng disini, jalah boeat bikin bebrapa pertanja'an pada kaoe.’’

—————————

Satoe djam kamoedian, koetika ini njonja masih berada dalem peloekannj Landru, ada kadengeran soeara treak jang ngeri. . . . . . .

Ratjoen jang heibat soeda menjerang keras pada paroe-paroe dan antero peroetnja njonja Collomb, hingga ini njonja rasaken tenggorokannja terbakar, antero bibirnja djadi biroe dan matanja mera sebagi bara.

Landru biarken itoe prampoean jang sedeng bertjilaka bertreak-treak sakoeatnja, sebab Landru toe, pada waktoe tengah malem bagitoe, tida nanti ada satoe iblis atawa pedjadjarasi jang maoe denger soeara ratapan jang sedin itoe.

„Ampoen, Fieminet! toeloengin akoe ambil satoe gelas aer dingin, toeloeng lekas! leherkoe terbakar! peroetkoe angoes! Oh! Allah! ja robi! apakah kaoe bikin pada dirikoe, Freminet! Oh! Freminet! apa kaoe ratjoenken akoe! Ja, Allah! kaoe boenoeh akoe sebab kaoe ingin hartakoe! Adoeh! toeloeng.

Dengen sakoeat tenaganja, njonja Collomb tjoba bangoenken dirinja aken hampirken satoe karaaf dimana ada tersimpen aer dingin, tapi baroe sadja kakinja toeroen dari korsi itoe, lantas ia roeboeh sebagi satoe kadebong pisang, badannja berkledjetan, moeloetuja kaloear boesah, matanja mendelik.

Landru tinggal mesem, ia awasken itoe kadjadian dengen hati penoeh kakedjeman.

Samentara ia lagi pikirken apa kamoedian ia moesti bikin dengen maitnja itoe korban, sakoenjoeng-kbenjoeng Landru ada denger soeara orang bitjara di depan pintoe roemahnja, dan tida lama Landru denger pintoe depan di ketok dan bel berboenji dengen njaring!

Landru terkedjoet. . . . . .

Di hadepan iioe mait ini badjingan jang njalinja besar tida bisa bergerak. . . . .

Dari djidatnja jang poetjat ada mengetel karinget dingin.

BAGIAN VIII.

Boekoe Itemnja Landru

———

Itoe waktoe soeda djam poekoel tiga pagi, sapoeternja gedong Hermitage di Gambais ada soenji, soearanja itoe pintoe jang diketok ada kadengeran njata sekali di antara boenjinja djangkrik dan laen-laen binatang aloes.

Tida ada laen manoesia jang denger itoe soeara ketokan pintoe salaennja Landru sendiri, samentara njonja Collomb jaug terletak di hadepannja soeda djai mait. Kaloe saorang laen jang berdiri di hadepan mait itoe dan dapet denger itoe soeara ketokan pintoe jang tida terdoega, tentoe djoega itoe waktoe ia soeda katakoetan satengah mati, aken tetapi Landru ada satoe badjingan oeloeng jang belon perna merasa keder boeat segala matjem antjeman, katjoeali terkasiap sedikit.

Soearanja bel pintoe berboenji lagi. Landru pikir ia tida boleh tinggal diam sadja aken poera-poera itoe roemah tida orangnja, sebab dari loear orang bisa liat di roewangan dalem ada kaliatan sinarnja lampoe.

Dalem hatinja Landru menanja: Apakah marika ada orang-orang politie. Dan kaloe betoel orang politie, apakah marika soeda liat apa jang soeda kadjadian dalem itoe kamar dan sekarang dateng hendak tangkep padanja?

Dalem hatimja ia mengoetoek, tapi lantas djoega hati itoe djadi tetap kombali. la lantas ambil poetoesan aken samboet datengnja itoe orang, maka sasoedanja beresken pakeannja, lantas ia menoedjoe ka roewangan depan. Pintoe salon dimana maitnja njonja Collomb ada terletak, ia kontji dari loear, kontjinja ia masoeken dalem sakoenja, kamoedian ia hampirken pintoe depan bersadia boeat hadepken apa djoega jang bakal terdjadi.

Marie toenggoe sampe Landru soeda abis menoelis, kamoedian dengen soeara perlahan ia moelai menanja pada itoe bantjingan :

„Papa Lulu, apa kaoe soeda perna tinggal di Vernouillet?"

Landru kaget, sebab ia tida sangka jang Marie aken bikin itoe pertanjaän.

Vernouillet?" mengoelangi Landru seperti orang jang baroe perna denger itoe nama. ,,Dimana itoe Vernouillet? Dan kenapa kaoe tanjaken itoe?"

Landru poenja roepa jang mendadak djadi berobah boeat sabentaran, ia poenja djawaban jang sedikit lama, menerbitken tjoerigaän dalem hatinja Marie.

Landru poenja kwatir dan kaget dengen itoe pertanjaän melinken sabentaran sadja. Tida lama kamoedian ia soeda bisa kaloearken pertanjaän jang lemah lemboet pada Marie:

„Apakah jang mendjadi sebab maka kaoe tanja akoe soeda perna tinggal di Vernouillet? Apa kaoe ada poenja kenalan disana?"

„Tida," djawabnja Marie. „Tapi, Papa Lulu, kaoe poenja roepa ada mirip sekali dengen apa jang ditoelis dalem soerat kabar Bon Soir jang akoe baroesan ada batja. Soerat kabar itoe ada tjeritaken tentang saorang lelaki jang berdjenggot nama Raymond Diard, ditoedoe soeda melakoeken pemboenoehan di Vernouillet atas dirinja satoe prampoean djanda dan anaknja lelaki."

„Raymond Diard?" menanja Landru dengen soeara perlahan. aken tetapi dari roepanja ada ternjata jang ia ada sedikit kaget denger pertanjaän itoe.

„Ja," djawabnja Marie dengen ketoes, kerna dari gerakan dan omongannja Landru ia dapet kanjatahan sasoenggoenja ini Papa Lulu ada itoe orang djahat jang sedeng ditjari oleh politie di Parijs. „Kaoe soeda djoestaken akoe, Papa Lulu," kata lagi Marie dengen roepa mendongkol dan menjesel. ,,Kaoe tida maoe bilang teroes terang jang kaoe soeda perna tinggal di Vernouillet dan kaoe soeda pake nama jang aneh, tida brani pake kaoe poenja nama Raymond Diard!"